15/2
跟上一個update相隔唔夠2個鐘, 白子紅化全紅緞帶夫人就瓜咗......
沖涼前仲見佢浮緊面, 沖完涼出嚟.....
05:00
佢鑽咗入去酒桶個窿度, 淨係露出咗尾部, 見佢完全唔郁, 外觀好似死咗咁, 於是伸把鉗落去輕輕扯佢出嚟, 扯咗2吓都有反應想縮入去, 之後由水面望落去, 見到胸鰭唔郁, 再扯, 今次完全無反應, 一扯扯咗出嚟, 瓜咗, 頭頂又多咗一大點紅點傷痕.........頭先扯佢嗰2嘢反應可能係肌肉條件反射吧.......
拎出水面睇, 佢個股突吓突吓郁緊, 即刻萌生一個念頭, 攞佢D魚B出嚟!!!
臨急臨忘, 先發覺原來無𠝹刀, 攞生仔兜裝住, 攞支針一拮, 放咗好多魚B胎出嚟, 成咗形, 但唔郁, 應該全部都仲未爆卵, 第1次咁整, 所以開頭拮爆咗好多卵, 唧出嚟嗰時應該都擠壓到入面未出嚟亦未爆的卵好勁, 最後出晒嚟, 成條跌出嚟的應該瓜晒, 淨低未爆卵的都無乜希望
整甩咗夫人好多鱗.......
過咗幾個鐘, D卵都開始變白, 連僅有少少紅色都消散埋......不過都諗住繼續浸多一日睇吓點先
又過咗一陣, 帶咗第2任夫人返嚟, 因為缸水勁嗅, 所以突然有衝動想清咗個缸, 估唔到幾個鐘後即刻用得著.......變成醫生缸......
喺洗缸前, 將第2任夫人放咗落(大缸){未命名新缸}度保溫
原袋保溫中.....我竟然發現唔到原來未出袋已經染咗白點病.....影相嗰時都唔知.....
夫人:"咁都得?!
"(設計對白)
呢個時候, 終於知沉底的白子紅化全紅緞帶先生發生咩事, 條尾上同下角位有紅褐色, 而且下角都幾深.........但佢已經落咗缸2日, 可能一早都出咗事, 今次又遲咗發現......
比啱買返嚟嗰日收咗尾
值得留意的係, 天氣咁啱呢1,2日轉冷, 之前D魚都係轉天氣先病, 但又咁啱次次買返嚟都即轉天氣......
即刻用樽仔隔起咗先生, 放住喺同缸保溫先
過咗幾個鐘, 終於洗好細缸了, 呢個時候, 佢正好發揮作用, 易名{醫園}, 取其諧音"醫完"(醫好咗)
因為先生乃咗嘢, 所以都金精火眼檢查同缸5條魚身, 結果發現另一位白子紅化全紅緞帶先生個身側面望好似有白斑, 但D白斑又好似本身顏色, 但正面望佢嗰陣白斑嗰D位又好似有白點突咗出嚟, 橫掂有個醫生缸, 索性捉埋佢出嚟醫
另一位先生白點似是而非, 超難睇
16/2
真係家門不幸......一家三口齊齊中招.....
夫人白點病正邁去高峰期, 3條同缸其實都超驚2位先生會惹埋夫人白點病 
醫生缸得一個, 實在難於取捨, 夫人白點, 先生車輪蟲, 另一先生疑似白點, 顧此失彼, 最後落咗魚救, 希望佢大小通吃, 可惜事與願違.......
可能使用不當, 發覺魚救今次對白點病毫無作用.... 幾個鐘之後一家三口一齊嚴重咗.......
夫人白點惡化到全身都係......
車輪蟲先生個身出埋白點,
唔知本身就乃咗嘢, 定係俾夫人惹到
另一位先生個身都
開始出好細粒的白點, 都係嗰句, 唔知本身就乃咗嘢, 定係俾夫人惹到
距離第1次落藥唔夠12個鐘, 實在忍唔到手, 換咗1/3水, 落1次白點淨, 都覺個缸D藥會太濃, 但想搏一搏......
幾個鐘之後......
夫人身上白點簡直到巔峰狀態, 太恐怖了....
2位先生白點亦都惡化咗......
有少少打定輸數....
再幾個鐘之後......
夫人好咗好多
車輪蟲先生白點褪咗8,9成, 但尾鰭紅褐邊未好過
另一位先生白點病正值巔峰期, 白點大大粒
17/2
車輪蟲先生情況並唔樂觀........
瘦咗成個碼, 又再收咗D尾鰭, 尾鰭紅褐位大咗好多, 而且尾鰭望落好似無乜光澤, 少少似已故天空藍白子臨死前尾鰭暗淡無光咁, 浮面游但無乜力
尾鰭中間對上無爛(張相裡面鰭中間對上灰色位可能雜訊), 尾鰭淨係上下角位有紅褐邊,
雖然呢張相2尾鰭焦距唔同, 但睇實魚車輪蟲先生尾鰭質感的確較差
真係好驚呢種浮面法
忍唔住餵咗小量利口糧同赤蟲, 一家三口清晒, 但車輪蟲先生實在太瘦了......
另一位先生同夫人非常活躍, 先生係咁追住夫人, 完全無收過鰭之餘, 仲
扯(背)旗同嗰度(見佢轉咗180度, 據聞公緞帶部分就係生殖器, 唔出緞帶嗰D公魚嗰度應該都係吧?), 唔通後生魚女係吸引D?
(夫人只得3個月大)
佢哋完全莫視咗車輪蟲先生
先生好猴摛.....
部咗好耐都影唔到夫人, 放棄....
夫人左邊身有2點白點, 但好似又開始起緊咁....
另一先生右背鰭仲有淺淺哋白點印未褪晒
最後, 選擇咗落返魚救, 希望今晚返嚟有好轉吧, 如無意外, 應該可以先放行狀態滿分嗰位先生同埋夫人
[
本帖最後由 Doioi 於 2010-2-18 00:39 編輯 ]
