幾日無update呢個缸了, 發生了好多事呢.........
話說........
10/2
白子紅化全紅夫人竟然喺呢個非常時期染咗白點病..........
嚴格嚟講, 應該係病發的第2日了, 所有鰭出咗6-8點
(剛到步嗰晚, 9/2, 尾鰭已經有2點, 但嗰時唔肯定)
不過........唔知用唔用得藥........淨係落咗鹽......
另一邊廂, 黑木炭夫婦遷入咗{洞心庭園}
11/2
病發第3日, 全身都出白點了, 原本之前有白點嗰D位仲大粒咗........危急關頭, 唯有要大唔要細了, 落白點淨3寶.......
12/2
由於病況跟已故黃化紅蕾絲夫人相若, 原本以為要醫幾日先醫好, 點知話都無咁快, 今日全身白點已經褪晒, 但呢個時候先發現原來左右胸鰭都拖住1/6長的爛部分(望落好似黐住咗白色爛魚糞咁), 而且近尾有紅褐斑, 好似乃咗另一種病, "
發炎—細菌性敗血病（氣單胞菌、假單胞菌和其他細菌）" (轉帖自出走@ -- {轉貼}觀賞魚常見33種疾病及治療 ) 
就係今日, 白子紅化全紅緞帶孖先生亦都到步, 本來諗住按照原定計劃安置晒一共6條魚喺{洞心庭園}度, 等夫人生咗之後先調缸, 但咁樣又好似係一個錯誤配搭, 所以最後嚟咗一場酷大的調缸工程 (暫時個感覺都仲係新手, 要攪呢D動作真係抹一額汗)
開頭諗住攪3個鐘就掂, 點知最後用咗5個幾鐘......
記錄返個工序, 再綜合吓大家意見(如果有), 方便日後參考:
1. 抽走{洞心庭園}1/6-1/8水至兜仔
2. 用粗鹽洗淨之前已故黃化紅蕾絲的"醫生樽", 裝住夫人, 放入{洞心庭園}對水
3. 抽走{洞心庭園}1/6-1/8水至兜仔
4. 原袋白子紅化全紅緞帶孖先生用水喉水沖淨, 放入{洞心庭園}保溫
7條魚聚首一堂, 不過屈質咗D
白子紅化全紅緞帶孖先生其中一位沉底, 另一位就游嚟游去
5. 用粗鹽洗大缸, 浸缸
6. 用粗鹽洗濾桶等等所有喺大缸用過的嘢(原桶生物環用水喉水齋沖)
7. 浸完缸, 用水喉水沖淨, 加水(熱水爐校到30度左右), set缸
8. 原袋白子紅化全紅緞帶孖先生用水喉水沖淨, 放入大缸對水
9. 開盡{洞心庭園}暖管(35度), 從兜仔補1/6-1/8水(凍晒, 應該跌到得返室溫1X度)至{洞心庭園}
10. 進行5-7期間夫人樽水已經溝咗3次, 喺{洞心庭園}拎走"醫生樽", 放生仔兜落再落夫人
11. 用粗鹽洗"醫生樽" (屋企現成得1001隻呢隻樽)
12. 將天空藍白子同埋黑木炭夫婦入樽再放入大缸對水, 順便餵埋, 都知好迫, 無計.....開頭佢哋就發神經亂衝, 唔係點食嘢, 主力都係天空藍白子夫婦食
13. {洞心庭園}落魚救3寶, 逐步加水至正常水位
14. 大缸對水完畢, 放晒6條魚出嚟
啱落缸佢哋仲係驚惶未定
之後兩位夫人狀態比較差, 天空藍白子夫人
一如以往, 超極速亂衝一通 
(最麻煩係咁樣, 影響埋其他魚, 本來唔係點驚都即刻驚埋一份), 衝完之後就浮喺暖管隔離呆咗
黑木炭夫人喺缸最左邊最入沉底, 兩位夫人天各一方
其他先生就喺偏右下游位置游,
天空藍白子先生追住另外3位先生條尾嚟啄.....唔知係咪因為自己條尾最細
沉底的白子紅化全紅緞帶先生都係繼續沉底.....
13/2
過咗一晚(其實只係3個幾鐘後, 因為攪埋其他嘢2點幾先瞓......囧), 清晨大缸全部魚各就各位沉底, 一開燈就彈起幾條......矇吓矇吓之下唔覺各位有表面傷痕或者病徵, 都好
夜晚返嚟大缸全部魚都活躍, 除咗沉底嗰條白子紅化全紅緞帶先生繼續沉底, 但沉得嚟無收尾無收鰭, 間唔中都會起身貼住缸底游, 但就唔知點解唔游上嚟.......
餵片糧, 因為水流仲未set好, 水面浪好大, 由後左沖去後右, 一落糧到水面就俾水打到大部分沉底, 其中兩位白子紅化全紅先生就喺缸底啄晒D糧, 其餘4位就喺水面水中游食, 到赤蟲一落(
非常好的浮水性, 起碼唔會俾魚本身游動拍落缸底或者俾缸面水流打落缸底, 我落喺缸前邊, 一落就貼咗缸邊), 吸引晒全部魚, 除咗沉底白子紅化全紅緞帶先生
到相片時間, 因為多咗魚, 所以難影咗, 又唔擺得埋手機, 嚇親1條魚就會影響埋其他魚, 手機對焦太慢, 影到矇晒, 到時有造境更加難影了, 遲下真係要買返部相機了
每次影親天空藍白子夫人都會好清, 佢本身又靚又活躍, 又係第1條養好的, 所以我好鍾意呢條魚
矇矓美
黑木炭夫人最清係呢張了, 廢相機影黑魚有難度
黑木炭先生呢張矇, 但pose正, 好似剪影咁
夫唱婦隨
有幾粒水泡, 唔係白點
沉底白子紅化全紅緞帶先生
因為濾桶水流校到最細都好勁, 所以喺出水喉加裝一截卸壓喉段
再加埋日本水妖 (據聞好受歡迎的
)
呢一波工程大功告成!!!
六福齊來大合照
14/2
魚魚好活躍, 迎接新一年開始
應該每日都要吸2次屎吧, 今朝吸咗一次, 今晚又出返咁多, 伸喉落缸底確有驚嚇性, 但清缸唔吸真係好礙眼
今晚啱返嚟嗰時真係嚇一跳, 黑木炭先生側身45度開晒尾瞓咗喺缸底, 不過見其他魚都好似啱瞓醒咁動作遲鈍, 開燈無幾耐成缸魚都生猛返晒
另外, 究竟點先可以令沉底白子紅化全紅緞帶先生游起呢......佢無表面傷痕病徵, 識游識食, 但就硬係局限貼缸底郁動......
又另外, 發現而家開始另一位白子紅化全紅緞帶先生條尾俾天空藍白子先生追住嗰陣, 會凶返佢轉頭, 好似想還拖的
[
本帖最後由 Doioi 於 2010-2-15 03:06 編輯 ]
