財爺扮聾耳陳擋「暗招」
(明報)2010年3月2日 星期二 05:10
【明報專訊】財政司長曾俊華噚日到香港大學與學生對話,港大揀咗個平時開教務委員會嘅會議室嚟「招呼」鬍鬚曾,會議室嘅環境睇落唔錯,但人算不如天算,正當曾俊華回答學生嘅問題時,全場突然停電,全場「摸黑」3、4秒,Emily伸手不見五指。
與港大生對話 突然停電
遇到呢口的咁尷尬嘅場合,真係要識執生。電力唔使10秒就回復正常,作為會議主持人嘅港大社會科學院經濟金融學院高級名譽研究員郭國全,可能因為做過政府工,深明「抽水」之道,重見光明後好風趣咁話,停電可能因為財政預算案未有任何措施資助大學電費,惹來全場笑聲。唔通呢位前經濟顧問想叫政府向大學泵多口的水?久經歷練嘅鬍鬚曾就好醒扮聽唔到,繼續回應為何兩年前減紅酒稅,當咩事都無發生過。