見到去杜拜啲機票都唔係好貴，就同朋友仔第一次向中東出發喇！杜拜一向出名石油多、錢多到駛唔晒，好似魔術師咁變啲咩野出黎都無問題！我咁鍾意 shopping ，當然要去行吓世界最大的萬世 Mall 王── Dubai Mall 啦！
對於行慣商場嘅我哋，入到 Dubai Mall 都未免嚇一嚇，話晒呢度有 50 個標準足球場、差唔多 6 個海港城咁大，仲有成 1,200 舖頭，包括巴黎嘅 Galleries Lafayette 、美國 Blommingdale s 、英國玩具店 Hamleys…… 要行一日都無可能行得完。
不過要數最勁，都全商場入面竟然有個全球最大嘅水族館 Dubai Aquarium & Discovery Centre ；真係勁過香港個海馬公園好多架，據講水族館嘅水有一千萬公升，可以注滿四個奧運泳池，仲有成 85 種、 33,000 隻海洋生物，簡直好似用大銀幕睇魚樂無窮！
再行埋入海底隧道中，又可以安全地感受被 400 隻鯊魚圍住嘅滋味！
跟手再上樓上嘅 Discovery Centre ，仲有好 cutie 嘅企鵝睇添！真係估唔到咁好玩呢！
